لندن ہائی کورٹ کا بڑا فیصلہ عادل راجا کے تمام الزامات جھوٹے قرار

لندن(پی کے نیوز)ہائی کورٹ نے سابق بریگیڈیئر راشد نصیر کی جانب سے دائر کیے گئے ہتکِ عزت کے مقدمے میں یوٹیوبر اور سابق فوجی افسر عادل راجا کے خلاف سخت فیصلہ سناتے ہوئے ان کے تمام الزامات کو جھوٹا، بے بنیاد اور بدنیتی پر مبنی قرار دے دیا ہے۔عدالت کے تفصیلی فیصلے میں کہا گیا کہ جون 2022 میں عادل راجا نے جو دعوے کیے تھے، ان کی حمایت میں کوئی قابل اعتبار یا قابلِ قبول ثبوت پیش نہیں کیا گیا، اور یہ الزامات محض بہتان تراشی اور ساکھ کو نقصان پہنچانے کی کوشش تھے۔عدالتی حکم کے مطابق عادل راجا کو بریگیڈیئر راشد نصیر کو:50 ہزار پاؤنڈ (تقریباً 1 کروڑ 87 لاکھ روپے) ہرجانہاور2 لاکھ 60 ہزار پاؤنڈ (تقریباً 9 کروڑ 72 لاکھ روپے) عبوری قانونی اخراجاتادا کرنے ہوں گے۔ تمام رقوم 22 دسمبر 2025 تک ادا کرنا لازمی قرار دی گئی ہیں۔عدالت نے مزید حکم دیا کہ عادل راجا اپنے تمام سوشل میڈیا پلیٹ فارمز پر عدالتی فیصلے کا خلاصہ 28 دن تک نمایاں طور پر آویزاں کریں، اور مستقبل میں ایسے الزامات دہرانے سے روکنے کے لیے سخت عدالتی پابندی (injunction) بھی عائد کر دی گئی ہے۔فیصلے میں خبردار کیا گیا ہے کہ اگر انہوں نے عدالتی احکامات پر عمل نہ کیا تو ان کے خلاف توہینِ عدالت، بھاری جرمانہ اور ممکنہ جیل کی کارروائی ہو سکتی ہے۔