پارٹی کا کو لیڈر مذاکرات کرے گا تو وہ عمران خان کے مؤقف کو رد کرے گا علیمہ خان

اسلام اباد (پی کے نیوز)بانی چیئرمین پاکستان تحریک انصاف عمران خان کی ہمشیرہ علیمہ خان نے واضح کیا ہے کہ جو بھی پی ٹی آئی کے اندر رہتے ہوئے مذاکرات کی بات کرتا ہے، اس کا نہ تو عمران خان سے کوئی تعلق ہے اور نہ ہی وہ حقیقی معنوں میں پارٹی کا حصہ ہے۔
راولپنڈی میں انسداد دہشت گردی عدالت کے باہر میڈیا سے گفتگو کرتے ہوئے علیمہ خان نے بتایا کہ عمران خان اپنا مؤقف واضح کر چکے ہیں اور اسٹریٹ موومنٹ کا پیغام خیبر پختونخوا کی قیادت تک پہنچا دیا گیا ہے۔ انہوں نے کہا کہ تحریک تحفظ آئین پاکستان کی دو روزہ کانفرنس کے اعلامیے کے بارے میں انہیں کوئی معلومات نہیں۔
علیمہ خان کا کہنا تھا کہ عمران خان نے گزشتہ برس 22 نومبر کو مکمل طور پر پرامن احتجاج کی کال دی تھی، تاہم اب ان پر یہی الزام لگایا جا رہا ہے کہ انہوں نے بانی پی ٹی آئی کا پیغام عوام تک پہنچایا۔
انہوں نے توشہ خانہ کیس کو بے بنیاد قرار دیتے ہوئے کہا کہ عمران خان اور بشریٰ بی بی کے خلاف یہ مقدمہ محض سیاسی انتقام ہے۔ علیمہ خان کے مطابق عمران خان نے حالیہ دنوں میں بھی پیغام بھجوایا ہے کہ وہ قوم کے مفاد میں ہر قربانی دینے کو تیار ہیں۔
علیمہ خان نے مزید بتایا کہ عمران خان کو 11 کتابیں بھجوائی گئی تھیں، جن میں سے جج کے مطابق 9 کتابیں انہیں موصول ہو چکی ہیں۔