فضا علی نے ندا یاسر پر تنقیدی میری طلاق کی ویڈیو وائرل کروائی گئی: فضا علی

پاکستانی اداکارہ اور مارننگ شو میزبان فضا علی ایک بار پھر سوشل میڈیا پر موضوعِ بحث بن گئی ہیں۔ حالیہ دنوں میں مختلف تنازعات کے باعث ان کا پروگرام ’مارننگ ود فضا‘ مسلسل خبروں میں ہے۔
ماضی میں فضا علی نے ندا یاسر اور صبا فیصل کی بعض گفتگوؤں پر تنقید کی، جبکہ کاشف ضمیر سے متعلق مبینہ نقلی سونے کے معاملے پر بھی ان کے بیانات وائرل ہوئے۔
اب تازہ معاملے میں فضا علی نے بالواسطہ طور پر ندا یاسر پر الزام عائد کیا ہے کہ ان پر تنقید کے بعد ان کی پرانی طلاق سے متعلق ویڈیوز جان بوجھ کر دوبارہ سوشل میڈیا پر پھیلائی گئیں۔
فضا علی کا کہنا ہے کہ انہوں نے ڈیلیوری رائیڈرز کے حق میں ایک منطقی اور حقیقت پر مبنی مؤقف اپنایا، جس کے جواب میں ان کی ذاتی زندگی کو نشانہ بنایا گیا۔ ان کے مطابق ایک پرانا کلپ، جو عرصہ دراز سے منظر عام سے غائب تھا، دوبارہ وائرل کیا گیا۔
انہوں نے افسوس کا اظہار کرتے ہوئے کہا کہ پاکستان میں بے شمار سنجیدہ مسائل موجود ہیں، مگر لوگوں نے ان کی طلاق کے بجائے اس بات پر زیادہ توجہ دی کہ طلاق کے وقت ان کے سابق شوہر بے ہوش کیوں ہوئے۔
فضا علی کے مطابق طلاق خود ایک تکلیف دہ عمل ہے، لیکن ہمارے معاشرے میں عورت کو اس کے بعد مزید ذہنی اذیت کا سامنا کرنا پڑتا ہے۔
اداکارہ کا کہنا تھا کہ انہوں نے طلاق کے بعد اپنی زندگی کو سنبھال لیا تھا، مگر پرانے زخم دوبارہ کریدے گئے جس پر انہیں اپنا مؤقف واضح کرنا پڑا۔
انہوں نے واضح الفاظ میں کہا کہ کسی کے دکھ، تکلیف اور ذاتی زندگی کو مواد یا تفریح بنانا کسی کا حق نہیں۔