پبلک ٹرانسپورٹ میں بغیر پردہ سفر پر تنازع، شوہر نے بیوی اور دو کمسن بیٹیوں کو قتل کر کے گھر میں دفن کر دیا

اتر پردیش (پی کے نیوز )باہر کے دروازے سے پردہ ہٹا کر جیسے ہی گھر میں قدم رکھا جائے تو سامنے ہی زمین میں بنا ایک گہرا گڑھا دکھائی دیتا ہے، جو اس مکان کے اندر چھپے ہولناک راز کی نشاندہی کرتا ہے۔
گھر کے ایک کمرے میں ایک پرانا اور ٹوٹا پھوٹا بیڈ پڑا ہے، جبکہ دوسرے کمرے میں دو چارپائیوں پر بستر بچھے ہوئے ہیں۔ کمرے کے ایک کونے میں رکھا گیس کا چولہا اور اس کے ساتھ موجود برتن اس بات کا ثبوت دیتے ہیں کہ یہی جگہ کبھی باورچی خانے کے طور پر بھی استعمال ہوتی رہی۔
یہ مکان دونوں اطراف سے اونچی عمارتوں میں گھرا ہوا ہے اور درمیان میں ایک کھلا صحن موجود ہے، جہاں مٹی کا چولہا کئی دنوں سے سرد پڑا ہے، جیسے یہاں زندگی اچانک تھم گئی ہو۔
16 دسمبر کو پولیس نے اسی گھر کے بیت الخلا کے سامنے بنے ایک گڑھے سے تین لاشیں برآمد کیں۔ پولیس کے مطابق فاروق نامی شخص کو اپنی اہلیہ طاہرہ اور دو کمسن بیٹیوں کے قتل کے الزام میں گرفتار کر لیا گیا ہے۔ واقعے نے علاقے میں خوف اور سنسنی کی فضا قائم کر دی ہے، جبکہ تحقیقات کا عمل جاری ہے۔