آئی ایم ایف کا بینظیر انکم سپورٹ پروگرام کے بجٹ میں اضافے پر اطمینان، کفالت امداد بڑھانے کی سفارش

عالمی مالیاتی ادارے (آئی ایم ایف) نے بینظیر انکم سپورٹ پروگرام (BISP) کے بجٹ میں اضافے پر اطمینان کا اظہار کرتے ہوئے بے نظیر کفالت پروگرام کے تحت دی جانے والی امداد میں مزید اضافہ کرنے کی سفارش کر دی ہے۔آئی ایم ایف کے مطابق بین الاقوامی معیار کے مقابلے میں بے نظیر کفالت پروگرام کے تحت فراہم کی جانے والی مالی امداد اب بھی کم ہے، تاہم سماجی تحفظ کو بہتر بنانے کے لیے بینظیر انکم سپورٹ پروگرام کے بجٹ کو مزید مضبوط کیا گیا ہے۔ادارے کا کہنا ہے کہ صارفین کی قوتِ خرید برقرار رکھنے کے لیے مراعات میں مناسب اضافہ کیا جا رہا ہے، جبکہ بینظیر انکم کے بجٹ میں امدادی پروگراموں کے اخراجات میں 20 فیصد اضافہ شامل ہے، جس کے نتیجے میں کفالت پروگرام کے تحت نقد امداد میں اضافہ ممکن ہو گا۔آئی ایم ایف نے سفارش کی ہے کہ غیر مشروط نقد امداد کی رقم 13 ہزار 500 روپے سے بڑھا کر 14 ہزار 500 روپے کی جائے، جس سے کفالت پروگرام کی کوریج میں کم از کم 2 لاکھ نئے خاندانوں کے اضافے کی توقع ہے۔عالمی مالیاتی ادارے کے مطابق مالی سال 2026 کے اختتام تک مستفید خاندانوں کی تعداد 10.2 ملین تک پہنچ جائے گی، جبکہ 2026 میں نئے گھریلو سروے کے بعد کفالت پروگرام کی امداد میں مزید اضافہ کیا جانا چاہیے۔آئی ایم ایف نے افراطِ زر کے مطابق کفالت پروگرام کی رقم میں مسلسل ایڈجسٹمنٹ اور کنڈیشنل کیش ٹرانسفر پروگرام کی کوریج میں توسیع کی بھی سفارش کی ہے، جبکہ بینظیر انکم کے کنڈیشنل کیش ٹرانسفر بجٹ کے مکمل استعمال کو نہایت اہم قرار دیا ہے۔