میٹرو بس ملازمین کا احتجاج کامیاب، تنخواہوں کی یقین دہانی پر ہڑتال ختم
اسلام آباد (پی کے نیوز)جڑواں شہروں میں میٹرو بس سروس کے ملازمین کا احتجاج کامیاب ہو گیا، جس کے بعد سروس بحال کر دی گئی۔ ملازمین نے تنخواہوں میں بلاجواز کٹوتی اور مکمل ادائیگی نہ ہونے کے خلاف ہڑتال کی تھی۔ذرائع کے مطابق اسلام آباد اور راولپنڈی کے درمیان چلنے والی میٹرو بس سروس کے ملازمین نے آئی جے پی اسٹیشن کے قریب بسوں کو روک کر ٹریک پر دھرنا دیا۔ مظاہرین نے پلے کارڈز اٹھا رکھے تھے جس کے باعث بس سروس معطل رہی اور شہریوں کو شدید مشکلات کا سامنا کرنا پڑا۔ملازمین کا کہنا تھا کہ گزشتہ دو ماہ سے نجی کمپنی انتظامیہ نہ صرف تنخواہیں ادا نہیں کر رہی بلکہ ہر ملازم کی تنخواہ سے چھ ہزار روپے کی کٹوتی بھی کی جا رہی تھی۔اطلاع ملنے پر سیکرٹری ریجنل ٹرانسپورٹ اتھارٹی راولپنڈی، سید اسد عباس شیرازی نے نجی کمپنی کے حکام سے مذاکرات کیے۔ مذاکرات کے دوران کمپنی کی جانب سے ملازمین کو جلد تنخواہوں کی مکمل ادائیگی کی یقین دہانی کروائی گئی۔یقین دہانی کے بعد ملازمین نے ہڑتال ختم کر دی جس کے ساتھ ہی میٹرو بس سروس دوبارہ بحال ہو گئی۔ اس موقع پر اسد عباس شیرازی نے واضح کیا کہ اگر پیر تک تنخواہیں ادا نہ کی گئیں تو کمپنی کے خلاف تادیبی کارروائی عمل میں لائی جائے گی۔
