عمران کی سیاست ختم نہیں ہونے والی عوام ان کے ساتھ ہے مفتاح اسماعیل:

سابق وفاقی وزیرِ خزانہ مفتاح اسماعیل کا کہنا ہے کہ بانی پی ٹی آئی کی سیاست ختم نہیں ہوئی کیونکہ انہیں آج بھی عوامی سطح پر نمایاں حمایت حاصل ہے۔ ان کے مطابق موجودہ سیاسی منظرنامے میں کوئی بھی رہنما بانی پی ٹی آئی جیسی مقبولیت نہیں رکھتا۔اے آر وائی نیوز کے ایک پروگرام میں گفتگو کرتے ہوئے مفتاح اسماعیل نے کہا کہ فواد چوہدری، محمود مولوی اور عمران اسماعیل پاکستان تحریک انصاف سے علیحدگی اختیار کر چکے ہیں۔ ان کا کہنا تھا کہ ان رہنماؤں کی کوٹ لکھپت جیل میں ملاقات بھی ہوئی ہے، اور اگر سیاسی مفاہمت کی کوئی صورت نکلتی ہے تو یہ ایک مثبت پیش رفت ہوگی۔انہوں نے حکومت کے معاشی دعوؤں پر تنقید کرتے ہوئے کہا کہ اگرچہ حکومت یہ مؤقف رکھتی ہے کہ گزشتہ دو برسوں میں معاشی استحکام آیا ہے، تاہم یہ کہنا درست نہیں کہ معیشت بہتری کی جانب گامزن ہے۔مفتاح اسماعیل نے کہا کہ عوام مہنگائی اور بیروزگاری کے باعث شدید پریشانی کا شکار ہیں اور معاشی بوجھ مسلسل بڑھ رہا ہے۔ ان کے مطابق حقیقت یہ ہے کہ پاکستان کی معیشت مسلسل تنزلی کی جانب جا رہی ہے۔سابق وزیر خزانہ کا کہنا تھا کہ پاکستان نے مختلف ادوار میں نواز شریف اور آصف علی زرداری جیسے رہنماؤں کو بھی دیکھا، مگر ایک مضبوط اور مستحکم معیشت دیکھنے میں نہیں آئی۔ انہوں نے کہا کہ سیاسی قیادت تبدیل ہوتی رہی لیکن گزشتہ پندرہ برسوں میں ملک پر قرضوں کا بوجھ مسلسل بڑھتا چلا گیا۔