پاکستان میں مہنگائی بڑھنے کا خدشہ، آئی ایم ایف کی نئی معاشی رپورٹ جاری

انٹرنیشنل مانیٹری فنڈ (پی کے نیوز)نے اپنی تازہ معاشی رپورٹ میں خبردار کیا ہے کہ آنے والے مہینوں میں پاکستان میں مہنگائی کی شرح میں اضافہ ہوسکتا ہے۔ رپورٹ کے مطابق ملک میں مہنگائی 4.5 فیصد سے بڑھ کر 6.3 فیصد تک پہنچنے کی توقع ہے، جبکہ جون 2026 تک یہ شرح 8.9 فیصد ہو سکتی ہے۔جون 2025 میں مہنگائی کی شرح 3.2 فیصد ریکارڈ کی گئی تھی۔آئی ایم ایف نے گزشتہ دو سال کی معاشی کارکردگی اور موجودہ مالی سال کی معاشی پیش گوئیاں بھی جاری کی ہیں۔ رپورٹ میں کہا گیا ہے کہ جاری مالی سال کے دوران پاکستان کی معاشی ترقی 3.2 فیصد رہنے کی امید ہے، جبکہ بیروزگاری کی شرح 8 فیصد سے کم ہو کر 7.5 فیصد تک آنے کا امکان ہے۔مزید کہا گیا ہے کہ مالی سال 2026 میں ٹیکسوں کا مجموعی قومی معیشت میں حصہ 16.3 فیصد تک بڑھ سکتا ہے جبکہ گزشتہ سال یہ شرح 15.9 فیصد تھی۔مالیاتی خسارے کے حوالے سے رپورٹ میں بتایا گیا ہے کہ 2026 میں خسارہ 4 فیصد تک کم ہوسکتا ہے، جو 2025 میں 5.4 فیصد تھا۔آئی ایم ایف کے مطابق 2026 میں ملکی قرضوں کا بوجھ جی ڈی پی کے 69.6 فیصد تک رہنے کا امکان ہے، جبکہ 2025 میں یہ بوجھ 70.6 فیصد تھا۔غیر ملکی قرضوں کا حجم 2026 میں بھی جی ڈی پی کے 22.5 فیصد کے قریب رہنے کی توقع ظاہر کی گئی ہے۔رپورٹ میں مزید کہا گیا ہے کہ 2026 میں سرمایہ کاری کی شرح 0.5 فیصد رہنے کا امکان ہے، جب کہ گزشتہ سال یہ 0.6 فیصد تھی۔ زرمبادلہ کے ذخائر میں بہتری کی پیش گوئی کرتے ہوئے کہا گیا ہے کہ 2026 میں ذخائر 17.8 ارب ڈالر تک پہنچ سکتے ہیں، جو کہ 2025 میں 14.5 ارب ڈالر تھے۔