پیپلز پارٹی صحافیوں کے ساتھ کھڑی، پی ٹی آئی کی سیاست پر شدید اعتراضات — شرجیل میمن

کراچی میں میڈیا سے گفتگو کرتے ہوئے سندھ کے سینئر صوبائی وزیر شرجیل انعام میمن نے واضح کیا ہے کہ پاکستان پیپلز پارٹی نے ہمیشہ صحافی برادری اور صحافتی اداروں کا ساتھ دیا ہے اور آئندہ بھی آزادیٔ صحافت اور صحافیوں کے حقوق کے تحفظ کے لیے بھرپور کردار ادا کرتی رہے گی۔ ان کا کہنا تھا کہ بدلتے ہوئے دور میں صحافت صرف پرنٹ اور الیکٹرونک میڈیا تک محدود نہیں رہی بلکہ ڈیجیٹل پلیٹ فارمز نے اس شعبے کو نئی شناخت دے دی ہے، اسی لیے صحافت کو جدید تقاضوں سے ہم آہنگ کرنا وقت کی ضرورت ہے۔
شرجیل میمن نے سندھ حکومت کی کارکردگی کا دفاع کرتے ہوئے دعویٰ کیا کہ صوبے میں صحت، تعلیم، انفراسٹرکچر اور سماجی فلاح کے شعبوں میں تاریخی اقدامات کیے گئے ہیں۔ ان کے مطابق سندھ میں 99 فیصد طبی سہولیات بالکل مفت فراہم کی جا رہی ہیں اور نہ صرف سندھ بلکہ ملک کے دیگر حصوں سے آنے والے مریض بھی یہاں جدید علاج سے مستفید ہو رہے ہیں۔ انہوں نے این آئی سی سی ڈی کا حوالہ دیتے ہوئے کہا کہ اس ادارے کا معیار عالمی سطح کے ہسپتالوں کے برابر ہے اور دنیا بھر میں سندھ کے اسٹیٹ آف دی آرٹ ہسپتالوں کو سراہا جا رہا ہے۔
ملکی سیاسی صورتحال پر بات کرتے ہوئے شرجیل میمن نے پاکستان تحریک انصاف کی سیاست پر شدید تنقید کی۔ ان کا کہنا تھا کہ بانی پی ٹی آئی ماضی میں طالبان کے دفاتر کھولنے جیسے بیانات دیتے رہے اور ان کے دور حکومت میں دہشت گرد عناصر کو رعایتیں دی گئیں۔ انہوں نے الزام لگایا کہ بانی پی ٹی آئی قومی اداروں کے خلاف منفی پروپیگنڈا کر رہے ہیں جبکہ پی ٹی آئی کی سیاست گالی گلوچ، انتشار اور نفرت پر مبنی ہے۔
شرجیل میمن نے دوٹوک الفاظ میں کہا کہ پیپلز پارٹی کا پی ٹی آئی سے کسی قسم کا سیاسی اتحاد یا مفاہمت کا کوئی ارادہ نہیں، کیونکہ ان کی سیاست اور طرز عمل پر سنجیدہ تحفظات ہیں۔ انہوں نے سوال اٹھایا کہ پی ٹی آئی نے تنقید اور نفرت انگیز بیانیے کے علاوہ عوام کو آخر دیا کیا ہے؟
سندھ میں وزیراعلیٰ سہیل آفریدی کے دورے سے متعلق سوال پر شرجیل میمن نے کہا کہ مہمان نوازی سندھ کی روایت ہے۔ اگر کسی صوبے کے وزیراعلیٰ سیاسی سرگرمیوں کے لیے سندھ آنا چاہتے ہیں تو سندھ حکومت ان کا خیرمقدم کرے گی اور انہیں خوش آمدید کہا جائے گا۔