شیر افضل مروت کے انکشافات، پی ٹی آئی کے قانونی فنڈز پر سوالات کھڑے ہو گئے

اسلام آباد(پی کے نیوز)پاکستان تحریک انصاف کے سابق رہنما شیر افضل مروت کے تازہ دعوؤں نے پارٹی کے اندر ایک نئی بحث چھیڑ دی ہے۔ ان کا کہنا ہے کہ پی ٹی آئی کے قانونی مقدمات لڑنے کے لیے اب تک وکیلوں کو مجموعی طور پر ایک ارب روپے ادا کیے جا چکے ہیں، تاہم انہیں اس رقم کے استعمال کی تفصیلات کا علم نہیں۔شیر افضل مروت کے مطابق یہ رقوم مختلف ذرائع سے اکٹھی کی گئیں، جن میں اوورسیز پاکستانیوں کی جانب سے دی جانے والی خطیر رقم بھی شامل ہے۔ انہوں نے دعویٰ کیا کہ وزیراعلیٰ خیبرپختونخوا علی امین گنڈاپور کی جانب سے معروف وکیل سلمان اکرم راجہ کو 24 کروڑ روپے ادا کیے جا چکے ہیں۔سابق رہنما کا کہنا تھا کہ بعض وکیلوں کو ہائر کرنے کے لیے 20 سے 25 فیصد تک کمیشن بھی دینا پڑتا رہا۔ انہوں نے مزید بتایا کہ 26 نومبر کے بعد اوورسیز پاکستانیوں کی جانب سے 38 کروڑ روپے جمع ہوئے، جن کی نگرانی علیمہ خان اور خدیجہ شاہ کر رہی تھیں، تاہم یہ رقم کہاں خرچ ہوئی، اس سے وہ لاعلم ہیں۔شیر افضل مروت نے کہا کہ اگر کوئی ان کے بیانات کو جھوٹا سمجھتا ہے تو وہ عدالت جانے کے لیے تیار ہیں۔ علیمہ خان سے متعلق ایک سوال پر انہوں نے کہا کہ وہ بشریٰ بی بی کی ’’ایک دن کی مار‘‘ ہیں، اور جیسے ہی بشریٰ بی بی منظر عام پر آئیں گی، علیمہ خان کی حیثیت خود بخود ختم ہو جائے گی۔