ٹرمپ ایران میں مداخلت کے لیے تیار

امریکا کے سابق صدر ڈونلڈ ٹرمپ نے ایران میں جاری احتجاجی مظاہروں کے تناظر میں ایک بار پھر سخت بیان دیتے ہوئے ایران کے خلاف فوجی کارروائی کی کھلی دھمکی دے دی ہے۔ ٹرمپ نے سوشل میڈیا پر جاری اپنی تازہ ترین پوسٹ میں ایران میں ہنگامہ آرائی کرنے والوں کی حمایت کا اظہار کیا۔
ٹرمپ کا کہنا تھا کہ اگر ایرانی حکومت پُرامن مظاہرین پر گولیاں چلاتی ہے اور انہیں پرتشدد طریقے سے قتل کرتی ہے، جیسا کہ ان کے بقول یہ ایران کا معمول بن چکا ہے، تو امریکا خاموش نہیں رہے گا۔ انہوں نے واضح الفاظ میں کہا کہ ریاستہائے متحدہ امریکا ایسے مظاہرین کو بچانے کے لیے مداخلت کر سکتا ہے۔
سابق امریکی صدر نے مزید کہا کہ امریکا ہر طرح کی صورتحال کے لیے مکمل طور پر تیار ہے اور ضرورت پڑنے پر فوری کارروائی کی جا سکتی ہے۔ ٹرمپ کے اس بیان کے بعد خطے میں کشیدگی بڑھنے کے خدشات ظاہر کیے جا رہے ہیں جبکہ عالمی سطح پر اس بیان پر ملا جلا ردِعمل سامنے آ رہا ہے۔
سیاسی مبصرین کے مطابق ٹرمپ کا یہ بیان نہ صرف ایران کے لیے سخت پیغام ہے بلکہ مشرقِ وسطیٰ میں ایک نئی کشیدگی کا پیش خیمہ بھی بن سکتا ہے۔