پاکستان ہمارے دوست ہے اور قیامت تک رہے گا ترک صدر کا بڑا اعلان

ترکیہ کے صدر رجب طیب اردوان نے پاکستان کو ترکیہ کا مخلص اور قابلِ اعتماد اتحادی قرار دیتے ہوئے کہا ہے کہ دونوں ممالک کے درمیان برادرانہ تعلقات وقت کے ساتھ مزید مضبوط ہوں گے اور یہ رشتہ ہمیشہ قائم رہے گا۔
بحری دفاعی پلیٹ فارمز کی شمولیت سے متعلق منعقدہ ایک تقریب سے خطاب کرتے ہوئے ترک صدر نے اعلان کیا کہ تمام کامیاب آزمائشوں کے بعد جدید جنگی جہاز PNS خیبر پاکستان بحریہ کے حوالے کیا جا رہا ہے۔
صدر اردوان نے بتایا کہ پاکستان بحریہ کی آپریشنل ضروریات کو مدنظر رکھتے ہوئے چار جدید ملگیم (MILGEM) کلاس جنگی جہازوں کی تعمیر کا معاہدہ کیا گیا تھا، جس پر پاکستان اور ترکیہ مشترکہ طور پر کامیابی سے عمل درآمد کر رہے ہیں۔
انہوں نے کہا کہ اس منصوبے کے تحت پہلا جنگی جہاز PNS بابر 24 مئی 2024 کو پاکستان کے حوالے کیا جا چکا ہے، جبکہ تیسرا جہاز PNS بدر جون 2026 کے اختتام تک اور چوتھا جہاز PNS طارق 2027 کی پہلی سہ ماہی میں پاکستان بحریہ کے بیڑے میں شامل کر لیا جائے گا۔
ترک صدر کا کہنا تھا کہ دفاعی تعاون دونوں ممالک کے اسٹریٹجک تعلقات کا اہم ستون ہے اور یہ شراکت داری خطے میں امن و استحکام کے فروغ میں بھی اہم کردار ادا کرے گی۔